لە لالش کچانی کوردی ئێزدی یادی 8ی مارس دەکەنەوە

رووداو – لالش 

لە رۆژی جیهانی ژناندا، 150 کچی کوردی ئێزدی رزگاربووی دەستی داعش چوونە پەرستگای لالش و یادی ئەو رۆژەیان کردەوە، داوایانکرد ئەو كچ و منداڵانەی لەبن دەستی داعشدا ماون رزگاربکرێن.
 
کاتێک داعش دەستی بەسەر شنگالدا گرت، شەش هەزار و 417 کەس لە ژن و منداڵ و پیاوی دەستگیرکرد، لەو ژمارەیە تاوەکو ئێستا سێ هەزار و 373 کەس رزگارکراون. 

رزگاربوویەکی دەستی داعش کە لە رێوڕەسمی رۆژی جیهانی ژناندا بەشدارە لە پەرستگای لالش، دەڵێت، دوای چوار ساڵ هێشتا هەندێک لە کەسوکارەکەی لەبن دەستی داعش ماون و ژمارەیەکی زۆریش لە کوردانی ئێزدی لە کەمپەکاندا ژیان بەسەردەبەن.


150 کچی کوردی ئێزدی رزگاربووی دەستی داعش بەشدارییان کرد













Supply by [author_name]

پرۆگرامسازێکی دانیشتووی دهۆک 12 هەزار قوتابی هەیە

رووداو – دهۆک 

هاونیشتمانییەکی دانیشتووی دهۆک لەسەرانسەری جیهان 12 هەزار قوتابی هەیە و رۆژانە وانەکانی پرۆگرامسازی و دروستکردنی ماڵپەڕیان لەڕێگەی ئۆنلاینەوە بە زمانەکانی عەرەبی و ئینگلیزی فێر دەکات.

ئۆسامە جاسم تەمەنی 22 ساڵە و ماوەی پێنج ساڵە کاری پرۆگرامسازی دەکات. 
ئەو جگە لە دانانی خولی پرۆگرامسازی بۆ بەشێک لە گەنجانی دهۆک، ئێستا خەریکە کار لەسەر دروستکردنی تۆڕێکی کۆمەڵایەتی دەکات. 


فێری پرۆگرامسازی و دروستکردنی ماڵپەڕیان دەکات













Supply by [author_name]

لە هەڵەبجە نەخۆشخانەیەک بۆ بەرکەوتووانی چەکی کیمیایی کرایەوە


رووداو-هەڵەبجە

لە هەڵەبجە نەخۆشخانەیەک کرایەوە بۆ چارەسەری ئەو نەخۆشانەی بەرکەوتەی کیمیایین، هەروەها گەورەترین کۆمەڵگەی پەروەردەیی عێراقیش لە هەڵەبجە کرایەوە.

نەخۆشخانەکە لەلایەن حکومەتی هەرێمی کوردستان کوردستان بە تێچووی 12 ملیۆن دۆلار بونیاتنراوە. ئامێر و پێداویستی پزیشکی بۆ تەرخانکراوە، بەرکەوتوانی چەکی کیمیایی چیدیکە لەوێ چارەسەر وەردەگرن. 

هەر لە هەڵەبجە لە سەر ئەرکی کۆریای باشور بە تێچووی 7 ملیۆن دۆلار کۆمەڵگەیەکی پەروەردەیی هاوچەرخ کرایەوە، کونسوڵی کۆریای باشوور لە خۆشی سەرکەوتنی پرۆژەکە لە هەڵەبجە چووە سەر ستەیج و هەندێ دەهۆڵی کوتا. 

قوباد تاڵەبانی، جێگری سەرۆکوەزیرانی هەرێمی کوردستان لە رێوڕەسمەکەدا بەشداربوو و گوتی: “ئەمڕۆ رۆژێکی خۆشە بۆ حکومەتی هەرێمی کوردستان و بۆ هەڵەبجەش”.

هەروەها پشتیوان سادق، وەزیری پەروەردە بە خەڵکی هەڵەبجەی رایگەیاند، پرۆژەکانی ئەمڕۆ گەورەترین دیارین، بەڵام بچوکترین وەفان بۆ خەڵکی هەڵەبجە. 


کۆمەڵگەیەکی پەروەردەییش کرایەوە













Supply by [author_name]

یەکێتی هەوڵی رێککەوتنێکی نوێ لەگەڵ گۆڕان دەدات

رووداو-سلێمانی

لەدوای واژۆکردنی رێککەوتنەکەیان لەگەڵ پارتی ئێستا یەکێتی سەرقاڵی کردنەوەی دەرگایەکی نوێیە بۆ نزیکبوونەوە لەگەڵ گۆڕان

سەرکردایەتی ئەم حیزبە دوو بۆچونی لەبەردەستە، زیندووکردنەوەی رێککەوتننامەی دەباشان یان داڕشتنەوەی لێکتێگەیشتنێکی نوێ. بەڵام رای زاڵ لەنێویاندا لەگەڵ رێککەوتنی نوێدایە بەپێی گونجاندنی قۆناخی سیاسی ئێستا.

نەرمین عوسمان، ئەندامی سەرکردایەتی یەکێتی نیشتمانی کوردستان بە رووداوی راگەیاند: “لە کۆبوونەوەکانی سەرکردایەتی خۆمان جەختمان لەسەر ئەوە کردووەتەوە کە ئەم دەرگایانە دانەخەین چونکە ئێمە ئەگەر مەراممان بێت حکومەتێکی سەرکەوتوو لە دەستماندا هەبێت لە شوێنی ئاشتیدا ئەتوانین ئەو کارە بکەین لە ئاژاوەدا زەحمەتە، بۆیە هەوڵی جددی دەدەین بۆ ئەوەی ئێمە ئەم ناوچەیە ناوچەیەکی ئارامبێت بۆ ئەوەی بتوانین ئەوەی لە خەیاڵماندایە و ئەو پلانەی دامانڕشتووە جێبەجێ بکرێت”.

بەهەمان گوڕی یەکێتی حەزی نزیکبوونەوە لەنێو گۆراندا نابینرێت بەڵام دانیشتنیش رەتناکەنەوە، چونکە لەنێو ئەم حیزبە هێشتا ئەو نیگەرانیانە نەڕەوینەتەوە کە شەوی هەڵبژاردنی پەرلەمانی عێراق گەیشتە لوتکە.

دەست بەرزکردنەوەی پەرلەمانتارەکانی گۆڕان بۆ هەڵبژاردنی سەرۆکی پەرلەمان کە پشکی یەکێتیە رەنگە هەموو ئەو دۆخە بگۆڕێت کە ماوەیەکی زۆرە ئەم دوو لایەنەی لەیەک کردووە، بەڵام بۆ ئەمەش هێشتا نایانەوێت ئەو گفتە بدەن تاوەکو هەنگاوی کرداری نزیکبوونەوە لە یەکێتییەوە نەبینن.

عەبدولڕەزاق شەریف، ئەندامی جڤاتی نیشتمانی بزووتنەوەی گۆڕان بە رووداوی راگەیاند: “خواستی پەیوەندی و پێکەوەیی یەکلایەنە نییە، کورد لەمێژە گوتوویەتی شین و شایی بە دەستیوەیەتی، هەرکاتێک برادەرانی یەکێتی ئامادەییان تیابوو ئەو 
رێککەوتنە جێبەجێ بکەن گفتوگۆ لەسەر ناوەڕۆکی رێککەوتنەکە دەستپێدەکاتەوە”.

لە رۆژەکانی کۆتایی ساڵی 2017دا جڤاتی نیشتمانی بزووتنەوەی گۆڕان ئەو رێککەوتنەی هەڵپەسارد کە زۆرجار گرەوی یەکگرتنەوەی گۆڕان و یەکێتی لەسەر دەکرا، بەڵام ئێستا مەیلی نزیکبوونەوەی نێوانیان لەناو گۆڕانیشدا خەریکە سەردەردێنێت بەڵام کەمترە لە مەیلی یەکێتی.


مەیلی نزیکبوونەوە لەنێو گۆڕانیشدا خەریکە سەردەردێنێت













Supply by [author_name]

له‌ هه‌رێمی كوردستان زیاتر له‌ 35 هه‌زار ئۆتۆمبێلی بێ ساڵیانه هەن

رووداو-سۆران

له‌ هه‌رێمی كوردستان زیاتر له‌ سی و پێنج هه‌زار ئۆتۆمبێلی بێ ساڵیانه یاخود سەنەوی هەن، لەناو خەڵکدا بە تۆزوبا یان علوج ناسراون. 

هەندێکیان ل لایەن ئاسایشەوە رێگەیان پێدراوە و دۆسیەیان هەیە، بەڵام ژمارەیەکی زۆریان هیچ بەڵگەنامەیەکی فەرمییان نییە، شۆفێرەکانی ئەم ئۆتۆمبێلانە زۆرینەی کات شەوان پێی دەسووڕێنەوە، هەر لە شەویشدا مامەڵەیان پێوە دەکرێت. 

ئەو ئۆتۆمبێلانە کێشەیان بۆ بەڕێوەبەرایەتی هاتوچۆ و شەقامەکان دروستکردووە، سەنەوییان نییە کاتێک سەرپێچی دەکەن سزا نادرێن. 


کاتێک سەرپێچی دەکەن سزا نادرێن













Supply by [author_name]

پارتی و یەکێتی لیژنەیەک بۆ ئاساییکردنەوەی رەوشی کەرکووک پێکدەهێنن

رووداو-هەولێر

پارتی و یەکێتی لیژنەیەکی هاوبەش پێکدێنن بۆ ئاساییکردنەوەی کەرکووک، لیژنەکە لە سبەینێوە چوارشەممە 6-3-2019 دەستبەکار دەبێ و هەفتەی داهاتووش دەچێتە بەغدا. 

رێککەوتنی پارتی و یەکێتی لە 4-3-2019 بووە هۆی ئەوەی پرسی ئاساییکردنەوەی دۆخی کەرکووک لەگەڵ کارەکانی پێکهێنانی کابینەی نوێی حکومەتی هەرێمی کوردستان دەستپێبکات، رووداو زانیویەتی لەهەنگاوی یەکەمیشدا فراکسیۆنەکانی هەردوو حیزب لەبەغدا یەکدەخرێن بۆ کار لەسەر ئاساییکردنەوەی دۆخی کەرکووک، پۆستی پارێزگار کە پارتی رازی بووە بۆ یەکێتی بێت دەبێ لەنزیکترین کات ناوەکەی دیاریی بکرێت و لەکۆبونەوەی نێوان سەرۆک بارزانی و کۆسرەت رەسول ئەو کەسە دەبێتە بەربژێری هاوبەش بۆ پۆستەکە و لەئەنجوومەنی پارێزگا دەنگی لەسەر دەدرێت.

رزگار عەلی کە تاوەکو ئێستا بەربژێری فەرمی ئەنجوومەنی سەرکردایەتی یەکێتییە بەرووداوی راگەیاند: “ئەوەی لەسەر رێککەوتوون هێندەی مەبدەئی هاوبەشی و کارکردنی پێکەوەییە، هێندە پۆست و پێگە نییە”.

رزگار عەلی گوتی: “ئێمە هەم بۆ کەرکووک و هەم بۆ بەغداش بڕیاری ئەوەمانداوە بەیەک تیم کاربکەین، چونکە زۆر کەس وابیر دەکەنەوە بابەتەکە پۆستە، نەخێر دوێنێ و پێشتریش دوور و نزیک باسی پۆست نەکراوە، لەناو رێککەوتنە سیاسییەکە بابەتی ئاسایی بوونەوەی کەرکووک و ناوچە جێناکۆکەکانی تێدایە، بابەتەکە تەنیا کەرکووک نییە، خورماتووە، خانەقینە، شنگالە، مەخمورە، شوێنەکانی دیکەی پەیوەندیدار بەماددەی 140ـە ، لەسەر ئەوەش رێککەوتین کەچۆن ئەو کارە دەکەین، لەهەمووشی گرنگتر کارێک بکەین ئەم ناوچانە دەسەڵاتی مەدەنی تێدابێ”.

بەپێی زانیارییەکانی رووداو لیژنەکانی ئاساییبوونەوەی پارتی و یەکێتی دەبنە یەک لیژنە، دەچنە بەغدا بۆ ئەوەی دەسەڵاتی سەربازی لەکەرکووک کۆتایی پێبهێنن، ئەو پۆستانەی لەکورد سەندراونەتەوە بگەڕێندرێنەوە، هەمان ئەو لیژنەیە دانوستاندن لەگەڵ پێکهاتەکانی کەرکووکیش دەکات.

شاخەوان عەبدوڵڵا، ئەندامی لیژنەی ئاساییکردنەوەی دۆخی کەرکووک بە تۆڕی میدیایی رووداوی راگەیاند: “ئێستا تەنیا پارتی لیژنەی ئاساییبوونەوەی هەیە، ئەوکات دەتواندرێ لیژنەکەی پارتی فراوانتربکرێ و یەکێتیش بێنە لیژنەکەوە و فراوان بکرێ، بۆ ئەوەی بابەتی ئاساییکردنەوە خێراتربکرێ، دۆخەکە زووتر کۆتایی پێ بێت، پارتی دەچێتەوە کەرکووک کاتێک حاڵەتی سەربازی نەمێنێ و مەلەفی ئەمنی بگەڕێتەوە بۆ کەرکووکییەکان، ئەوکاتە پارتی بارەگاکانی دەکاتەوە”.

لەبڕگەیەکی دیکەی نێو رێککەوتنی پارتی و یەکێتی هاتووە لەئێستا بەدواوە بۆ هەر پرۆسەیەکی هەڵبژاردن لەناوچە کێشە لەسەرەکان، لایەنە کوردییەکان لیست و قەوارەی هاوبەشیان دەبێت.

پێداچوونەوە؛ عومەر شایان


دەچنە بەغدا بۆ ئەوەی دەسەڵاتی سەربازی لەکەرکووک کۆتایی پێبهێنن













Supply by [author_name]

پەرلەمان بۆ هەموارکردنەوەی یاسای سەرۆکایەتی هەرێمی کوردستان کۆدەبێتەوە

رووداو-هەولێر

پارتی چاوەڕێی کاندیدی یەکێتییە بۆ ئەوەی ببێتە سەرۆکی پەرلەمانی کوردستان و متمانەی زۆرینەی پێبدرێ و لە یەکەم کۆبوونەوەش یاسای سەرۆکایەتی هەرێمی کوردستان هەموار بکرێتەوە.

بڕیارە هەفتەی داهاتوو پەرلەمانی کوردستان کۆببێتەوە، پرسی یەکەم و سەرەکی، هەموارکردنەوەی یاسای سەرۆکایەتی هەرێمی کوردستانە، بۆ ئەوەی دەسەڵاتەکانی سەرۆک بەپێی یاسا دیارییبکرێن و لە زووترین کاتدا دەستبەکار بێت. 

یەکێتی و پارتی رێککەوتنی چوار ساڵییان واژۆکردووە، چاوەڕی دەکرێ پێکهێنانی حکومەت و یاساکانی نێو پەرلەمانیش ئاسان بن. بڕیارە ئەنجوومەنی سەرکردایەتی یەکێتی کۆببێتەوە، سەرۆکی پەرلەمان و جێگری سەرۆکوەزیرانی کوردستان بەربژێردەکەن. 


یەکێتی و پارتی رێکەوتنی چوار ساڵییان واژۆکردووە













Supply by [author_name]

سوپای پاسداران هۆشداری دەداتە دانیشتووانی 10 گوندی باشووری کوردستان

رووداو – گەرمیان 

سوپای پاسداران رێگە بە دانیشتووانی 10 گوندی سنووری شارۆچكەكانی قۆرەتوو و مەیدان نادات لە سنووری ئیدارەی گەرمیان، ئاژەڵەكانیان نزیك لە سنوور و لەسەر خاكی باشووری كوردستان بلەوەڕێنن.

شێركۆ محه‌ممه‌د، هاونیشتمانییەکی ئەو ناوچەیە دەڵێ ”له‌ماوه‌ی 10 رۆژدا، سێ جار رانه‌مەڕەکانمان گیران، كوڕه‌كه‌شیان گرتین و بردیانه‌ سه‌رپێڵ، شه‌و ئازادیان كرد، دواتر رانێكی دیكه‌ش گیرا و خاوه‌ن ران به‌ شه‌ڕە ‌دار و تفه‌نگ هێنایانه‌وه‌”.

تەنها ئاژەڵدارەكان نا، ئەوانەی زەوی كشتوكاڵیشیان هەیە و لە  زەوییەكانیاندا گەنم و جۆیان چاندووە، ده‌ترسن ره‌نجی ئه‌مساڵیان به‌فیڕۆ بڕوات، چونكه‌ ئه‌وانیش ناتوانن نزیكی زه‌وییه‌ كشتوكاڵییه‌كانیان ببنه‌وه‌.

نووری حوسێن سه‌لیم لە ئەنجوومەنی گوندی سه‌رقزڵ دەڵێ “پێنج هه‌زار دۆنم زەویمان لێرە هەیە، بەڵام لێمان بووه‌ته‌ موحه‌ره‌مه‌ و ناوێرین نزیكی ببینه‌وه‌، چونکە ده‌مانگرن. ناوێرین رانەمەڕیشتی تێدا بلەوەڕێنین… چووینه‌ بەڕێوەبەرایەتیی گەرمیان و ده‌ڵێن چارەی دەکەین، بەڵام هیچ ناکەن”.

پاساوی ئێران بۆ ئەم كارە؛ تووندوڵكردنی سنورەكانیێتی بۆ رێگریكردن لەو كەسانەی بە نایاسایی سنووری وڵاتەكەی دەبەزێنن. گلەیی خەڵكیش لە پاسەوانی سنوورە، ئه‌وانیش دەڵێن داوامان كردووە لیژنە بۆ دیاریكردنی سنوورەکە پێكبهێنرێت و چاوه‌ڕوانی بەغدا و تارانین.

رائید فه‌خره‌دین عه‌بدوڵڵا، فه‌رمانده‌ی لیوای سێ-ی پاسه‌وانی سنووری سلێمانی باس لەوە دەکات “نازانین كامه‌ سنوری راستییه‌، داوای لیژنه‌مان كردووه‌ و ده‌بێ بێن و سنوره‌كه‌ دیاریبكه‌نه‌وه‌، بۆ ئه‌وه‌ی بۆمان ده‌ربكه‌وێت؛ ئه‌و گوندانه‌ خاكی ئێرانن یان عێراق”.


سوپای پاسداران رێگەنادات دانیشتووانی قۆرەتوو زەوی و لەوەڕگەکانیان بەکاربێنن













Supply by [author_name]

سەدان خێزانی کوردی ئێزدی چاوەڕێی گەڕانەوەی رفێنراوەکانیانن

رووداو – کەمپی شاریا 

سەدان خێزانی کوردی ئێزدی چاوەڕێن دوای کۆنترۆڵکردنەوەی باغۆز بە دیداری کەسوکارە رفێندراوەکانیان شادببنەوە، بەڵام لەماوەی چەند رۆژی رابردوودا تەنیا 47 کوردی ئێزدی لە باغۆز رزگارکراون و گەیێندراونەتەوە باشووری کوردستان.

پوورە وەدحە، تەمەنی 67 ساڵە و ماوەی پێنج ساڵە، رۆژ دەژمێرێت بۆ شادبوونەوە بە هاوژین و سێ کوڕ و کچەکەی، کە لە ساڵی 2014ـدا کەوتوونەتە دەستی داعش.

وەدحە ئیبراهیم دەڵێ “گوتمان بەڵکو بگەڕێنەوە، چاولەڕێگەبووین، بەڵام هەر نەهاتنەوە، گوتمان بەڵکو لە سووریا بن، لە باغۆز بن، چاومان لەرێگەیە و هیوادارین خوا بۆمانیان بگەڕێنێتەوە، پشتمان بە خوا بەستووە”.

حوسێن قائیدی، بەرپرسی نووسینگەی رفێنراوانی کوردی ئێزدی دەڵێ “بەپێی زانینی ئێمە؛ ژمارەیەکی کەم ژن و منداڵ لەژێر دەستی داعشدا ماون لە باغۆز، هەروەها ژمارەیەکی زۆرتر لە عێراق و شارەکانی دیکەی سووریان. خەڵکی خۆمان، کەسوکاری رفێنراوەکان دڵنیادەکەینەوە، هەرکەسێک لە هەرشوێنێک بێت، رێنمایی بەڕێز سەرۆکوەزیرانە کە لەکوێ بن و چۆن بێت، دەستمان پێیان بگات”.

پێداچوونەوە: هەڵات رێبوار


لە رۆژانی رابردوودا 47 کوردی ئێزدی لە باغۆز رزگارکراون













Supply by [author_name]

28 ساڵ بە سەر راپەڕینی باشووری کوردستاندا تێدەپەڕێت

رووداو – رانیە

28 ساڵ له‌مه‌و به‌ر، خه‌ڵكی رانیه‌ دژ به‌ حكومه‌تی به‌عس راپه‌ڕین و له‌ ماوه‌ی چه‌ند كاژێرێكدا ته‌واوی داموده‌زگاكانی حكومه‌ت كه‌وتنه‌ ده‌ست هاونیشتمانیان و بڵێسه‌ی راپه‌ڕینه‌كەش‌ بۆ ماوه‌ی 20 رۆژی له‌ سه‌ریه‌ك به‌رده‌وامی هه‌بوو تا كه‌ركووكیش له‌ حكومه‌تی به‌عس سه‌نرایه‌وه‌.

ئەمڕۆ 28 ساڵ به‌ سه‌ر راپەڕینی ساڵی 1991ی باشووری كوردستان تێدەپەڕێت و لە رانیە چەند چالاکییەکی جۆراوجۆر لە ساڵیادی راپەڕین بەڕێوەدەچن.

بەختیار قادر، پەیامنێری رووداو لە رانیە رایگەیاند، ئەمڕۆ سێشەممە 5-3-2019، بەبۆنی 28 ساڵ تێپەڕبوون بەسەر راپەڕینی ساڵی 1991ی باشووری كوردستان و یەکەم چەخماخەی راپەڕین لە دەروازەی رانیە، لەو قەزایە چەند چالاکییەک بەڕێوەدەچن.

 

پەیامنێری رووداو دەڵێت، سەرەتای چالاکییەکانی ئەو بۆنەیە، دانانی تاجە گوڵینەیە لەسەر مۆنۆمێنتی شەهیدانی دەروازەی راپەڕین دادەنرێت و هاوکات گوتاری حکومەتی هەرێمی کوردستان لەلایەن سەرپەرشتیاری ئیدارەی راپەڕینەوە دەخوێندرێتەوە.

چالاکییەکانی ئەمڕۆ بە ئامادەبوونی نوێنەری لایەنە سیاسییەکان و کەسوکاری شەهیدان و خەڵکی دەڤەرەکە بەڕێوەدەچێت.

 

یه‌كه‌م گولله‌ی راپه‌ڕین له‌ رانیه‌ عه‌لی نه‌بی تەقاندی و بە یەکەم شەهیدی راپەڕین هەژمار دەکرێت. له‌ ماوه‌ی نزیكەی 10 كاژێردا حوكمی به‌عس له‌و شاره‌دا نه‌ماو نازناوی راپەڕینی پێ به‌خشرا.

رانیە دەکەوێتە باکووری خۆرھەڵاتی پارێزگای سلێمانی و نزیکەی 130 کیلۆمەتر لە شاری سلێمانییەوە دوورە. رانیە بە شاخەکانی کێوەڕەش و حاجیلە و ئاسۆس دەورە دراوە و لەڕووی کشتوکاڵییەوە دەشتی رانیە بەناوبانگە و خاکەکەی بە پیتە.

داڕشتنەوە؛ راوچی حەسەن 

 


لە رانیە کۆمەڵێک چالاکی بەڕێوەدەچن













Supply by [author_name]